Að leggja mat á gæði sem ekki hafa skýrt markaðsverð er vandasamt en um leið mikilvægt verkefni til að undirbyggja opinbera stefnumótun og ákvarðanir. Rannsóknarhópurinn Teymi um tekjuuppbót (ConCIV) vinnur að mati á virði óáþreifanlegra gæða á grundvelli tekjuuppbótaraðferðarinnar.

Fjárhagslegt virði gæða er fundið með því að mæla þá tekjuaukningu sem þyrfti til að vega upp á móti velferðartapi eða aukningu sem gæðin hafa í för með sér.

Dæmi um slíkt er virði þess að þjást af tilteknum heilsukvilla. Tölfræðileg tengsl milli tekna, heilsu og lífsánægju eru notuð til að meta óbein fórnarskipti milli tekna og heilsu. Slíka greiningu er hægt að nota fyrir aðra mikilvæga þætti lífsins, t.d. til að meta virði félagslegra samskipta og öryggis.

Tekjuuppbótaaðferðin hefur aðferðarfræðilega kosti umfram aðrar aðferðir sem meta virði gæða sem ekki hafa markaðsverð. Niðurstöður byggðar á aðferðinni eru enn af skornum skammti en það er þó ört að breytast.

Teymi um tekjuuppbót samanstendur af fræðimönnum frá ýmsum löndum og á ýmsum stigum starfsferils síns og nýtur það mikilvægra stofnanatengsla. Teymið er undir stjórn Tinnu Laufeyjar Ásgeirsdóttur, prófessors í hagfræði við Háskóla Íslands. Nánari upplýsingar um hópinn má finna á hér.